نهلة الحداد
يوم الفض بعد ما الشرطة اقتحمت بالرصاص الحي عيادات رابعة الي كنا فيها وأخلوها وطلعونا من الشارع الي وراها .. فضلنا واقفين مترقبين ايه الي هيحصل وكان بعض الاهالي شايلين ولادهم الشهدا والمصابين على ايديهم وماشيين بيهم في الشارع بيدوروا على عربيات يحطوهم فيها او يلحقوهم .. ساعتها شفت نار خارجة من مبنى العيادات .. طلعت اجري على المبنى لحد ما وقفني ضابط قافل الشارع فبصرخ وبقول له الدور الي طالع منه نار ده انتو ولعتوا فيه؟!! قال لي اه ..
قلت له بس ده فيه مصابين في الاوضة الي جوا انا مصوراهم بنفسي ..
قال لي لا احنا اتأكدنا انهم كلهم أموات ..
قلت له لا انا متأكده .. رد: خلاص ماشوفناهمش .. وبعدها تأكدت ان بعض هؤلاء المصابين لقوا حتفهم وهم يصارعوا النيران وكانت جثثهم واذرعتهم مخشبة وهى ممتدة وملتوية غير جثث الشهداء المتفحمة على هيئتهم وهم نائمين ..
ده اكتر حوار عبثي كنت طرف فيه في حياتي .. لاحظ اننا الاتنين منطلقين من قاعدة ان الاموات فعليا يستاهلوا الحرق .. مدافعتش حتى عن جثث الشهداء .. ولا عرفت ارد عليه لما قال لي ماشوفناهمش .. اكتفيت بترديد حسبي الله ونعم الوكيل وتذكرت سذاجتي انا ومن معي عندما اخرجونا بالقوة من العيادات وكنا قلقين على جثث الشهداء فرد علينا احدهم: يعني هيعملوا ايه فيها مثلا؟ هيحرقوها؟! فرد بعضنا لأ طبعا .. ولا اكنهم مثلا رموا جثث في الزبالة في التحرير قبل كده ولا اكنهم داسوا بالمدرعات على احياء واموات في ماسبيرو .. خالص
بقالي اكتر من اسبوعين مش فاكرة حاجة بعد يوم الفض ومش عارفة اكتب شهادتي.. بس بدأت كل شوية استرجع جزء من ذاكرتي عن اليوم ده
No comments:
Post a Comment