شاهد عيان - 35 -

فاطمة خالد

https://www.facebook.com/fatma.khaled.3576

وعن يوم المجزرة أتحدث

صليت جزء من قيام الليل معاهم في رابعة وصليت الفجر معاهم وقولنا أذكار الصباح مع بعض والنصة وقتها كانت بتشدد إن الجميع يطلع من الخيام لأن في قلق 

المهم بعد ما قولت الأذكار روحت الخيمة بتاعة بورسعيد وقعدت فيها شوية وبعد كده نمت على الأرض ساعة تقريباً الساعة دي كنت نايمة صاحيه سامعه الدكتور صلاح سلطان وهو عمال يكبر وعمال يصحي الناس اللي في الخيم وغيره من اللي كانوا واقفين على المنصة عمالين يكبروا وكانوا حاسيين بقلق أوشبه متأكدين إن هيحصل حاجة بس محدش توقع إنها هتكون بالمنظر ده طبعااا 

طلعت من الخيمة انا وبعض أصحابي على الساعه 5 تقريباً وفضلنا ماشيين ناحيه المنصه ووقفنا شويه بنستنا باقي البنات والناس كلها قلقانه وانا نفسي قلقانه جدا ومش مستريحه وإحساسي بالقلق ده من الفجر وفجأه وإحنا لسه مروحناش عند المنصه لسه واقفين قدام المستشفى الميداني سمعنا دوشه ناحيه الشارع المؤدي لطيبه مول الشارع اللي فيه خيمة البورسعيديه وفجأه الاقي طلق خرطوش إجى في دراعي خرم قماشه الخمار والعباية وفي نفس الوقت شاب قدامي أصيب بخرطوش في بطنه فضل يصرخ وأنا مش عارفه ايه اللي حرقني ده مش متخيله ان ده الخرطوش وعلى فكره كان جايلي من المساكن اللي ناحيه مسجد رابعه ولاد الـــ إيه مسبوش مكان مدخلولناش منه 

المهم أضحابي دخلوني المستشفى وكانت لسه فاضيه مفيهاش غير 2 او 3 بس والدكتورة كانت عايزه تطلعلي الخرطوش علطول بس الحالات كانت كترت ووضعي ابسط بكتير من الحالات اللي دخلت بعدي لان اللي بعدي كله كان طلق ناري 

المهم حطيتلي شاش وميكروكروم وطلعت ووقفت لوحدي مش معايا حد أعرفه لان أنا وأصحابي اتفرقنا عن بعض وقفت عند خيام كده جمب المستشفى الميداني وشوفت اعداد الناس اللي داخله المستشفى ورا بعضها كلها متغرقه دم اللي اتكسرت جمجمته واللي اخد رصاصه في صدره واللي اخد رصاصه في رجله ووووو حالات كتير وكلها شديده جدااا الدم بيسيل على الارض كده ومشوفتش غير عربيه اسعاف واحده وكمان مروحتش واجت كتير بقوا الناس بيجيبوا المصابين وهما شيلنهم او على موتسيكلات لدرجه انى شوفت ناس متجابه على عربيه الخضار البدائيه اوى دى اللي بإيدتين اللي الراجل بيفضل يجر فيها دي حسيت وقتها إننا مش بني أدمين الناس دي معتبرانا حيوانات

ده غير ريحه الغاز اللي مش طبيعيه ريحه فظيعه بتخلي العين تنزل دموع غزيره والانف تنزل مايه كتيره وبنعمل زي ما يكون بدره بيضه كده على الوش وبتسبب اختناق بشكل رهيب وبتخدر حوالين الشفايف كده اعتقد ان الغاز ده محرم دوليااا مش طبيعي 

أثناء وقوفي جمب الخيمه شوفت كل الشوارع المؤديه للميدان وهي مولعه دخان اسود ومن كل الاتجاهات ضرب نار مفيش حته نستخبى فيها ضرب من كل اتجاه الرصاص كان بيتطاير في الجو كده والطيارات فوق مننا بتنزل غازات وبتنزل رصاص علينا وفيه في السماء دخان على شكل خطوط بيضا في السما كده كنا في حرب والله العظيم حرب 

هبطت من شكل الدم ومن الدم اللي نازل مني المهم دخلت اقعد شويه جوه الخيمه وكان فيها 3 سيدات تقريبااا وعمالين يقولوا حسبنا الله ونعم الوكيل ويستغفروا بصوت عالى وواحده قدام عيني تيممت ضرب على الارض بإيديها كده واتقليتها بتصلي وطولت في السجود بتدعي ربنا اكيد وفجأه اتلقيت شمروخ او غازات بتحرق القوماش او قنابل حارقه مش عارفه بالظبط دخلت الخيمه وانا جوه ومسكت في القماش

الناس اللي بره فضلوا يصرخوا ويقولوا اطلعوا بره الخيمه وفضلت اصرخ واقول قومي يا طنط قومي وطلعت اجري بره الخيمه ومعرفش ايه مصير طنط دي لغايه دلوقتي يا ترى طلعت بره الخيمه قبل ما تتحرق كلها ولا فضلت ساجده !!

طلعت بجري ودخلت في خيمه تانيه قدام شويه وفجأه اتلقيت الخيمه بتتحرق وانا جواها طلعت اصرح الحقوني ووقتها اترمى كميه غاز فظيعه في المكان كل ده وانا في نص الميدان تقريبا مش على الاطراف امال اللي على الطرف كانوا عملين ايه للي بيسأل الميدان اتفض بسرعه كده ليه لانهم دخلولنا من كل حته ومن كل الشوارع ومن عند المستشفى الميداني اللي المفروض بتسعف المصابين 

كان معانا ناس في الميدان مخابرات بيدلوا على الاخوان بالاخص علشان يتقتلوا وكل لما يشوفوا تجمع بيجروا على خيمه معينه يقصفوها زي ما بيقولوا ويرموا عليها حجات تخليها تتحرق بللي جواها بقى مش مشكله لحقت تجرى بردو مش مشكله هتجيلك رصاصه برضو وانت ماشي 

طلعت من الخيمه التانيه بجري وهي بتولع ووقتها شميت كميه غاز كبيره وحسيت ان القنبله اترمت جمبي بس الواقع ان الميدان كله كان كده مليان غاز من كل اتجاه وقعت على الارض والرجاله شلوني وقعت منهم تاني ومكنتش قادره اتنفس نهائي وجالي دكتور وفضل يروشيلي حجات كده وبيبسي وخل ومفيش فايده لقيت نفسي رفعت السبابه وقولت التشهد في نفسي وبعد لما انتهيت من اشهد ان لا اله الا الله وان محمد رسول الله ارتاحت وفضلت مش عارفه اخد نفسي لدرجه اني مش عارفه اكح اصلا مفيش نفس الدكتور قالي قولي الشهاده بسرعه اتلقيت نفسي بقول اش ه د ان لا بشكل مقطع كده مش عارفه اقولها على بعضها لان كنت قاطعه النفس خالص وسبحان الله لسه دوري مكنش اجى 

وقوموني من على الارض ودخلوني ناحيه المسجد وفضلت ماشيه اتطوح لوحدي ومن رحمه ربنا نزل سائل من انفي كان سبب في اني افوق واخرج الغاز اللي شميته 

ودخلت المسجد ولسه باقي اليوم في بوست تاني ...

باقي شهادتي على يوم المجزرة 

بعد ما فوقت شوية والرجالة وصلوني لقرب المسجد 

الجو بره كان عبارة عن دخان اسود من كل الشوارع من الشارع المؤدي لطيبة مول ومن شارع الطيران ومن شارع النصب التذكاري ..

الشوارع كلها مولعه والسما سودا والغاز كثيييييف جدا و3 طيارات تقريبا فوقينا بتطير على مسافات قريبه مننا بتنزل غازات وبتضرب نار ..

ومش زي ما بيقولوا بدأوا بخراطيم مايه علشان يفرقونا ربنا ينتقم منهم ده أثناء وقوفي بره أول ما سمعنا دوشه في شارع طيبه مول في البدايه خالص

إتلقينا الجثث غرقانه في دمها إصابات خطيره واللي استشهد علطول ربنا ينتقم منهم 

والناس واقفين مكانهم مش عارفين يعملوا ايه هيروحوا فين !!

فين في الميدان مكان مكنش فيه ضرب نار وخرطوش أصلا !!

المهم دخلت المسجد في حدود الساعه 7 الصبح تقريبا وكان في كميه كبيره جدااا من الستات والأطفال ومجموعه قليله من الرجاله

دخلت وانا مش عارفه اقعد فين مفيش مكان فاضي قعدت بره شويه قرب الباب بتاع المسجد وشويه و دخلت جوه وفضلت واقفه وفجأه قطعوا الكهربا علينا والمراوح اتقفلت وكل حاجه وقفت وفضلنا محتجزين جوه المسجد 

شوفت نظرات الأطفال اللي مش فاهمين إيه اللي بيحصل 

واللي مخنوق من الريحه والأطفال اللي بيعيطوا وشويه واتلقيت الدكاتره بيقولولنا ضموا على بعض عايزين نص المسجد بالظبط فاضي للمصابين لان معدش في مكان في المستشفى الميداني ...

واتلقيت ست جمبي بتقولى معلش شيلي العيل ده مني شويه والنونو عمال يعيط وكان معاه اخوه 4 سنين كده برضو عمال يصرخ فقولتلها ده ابن مين ده احنا مش ضامنين نفسنا يا طنط ليه اخدتيه من امه 

قالتلي لاء انا اتلقيته على الرصيف بيعيط هو واخوه فقلولى الناس بره خديه وادخولى المسجد ااااااه يا بلد وصلت للدرجه دي !!

وابتدينا نتخنق اكتر لان الشبابيك كمان كانت مقفوله علشان مايدخولش غاز جوه المسجد والنونو عمال يعيط معايا مش عارفه اسكته وشويه واتلقيت جثث داخله المسجد وبعض المصابين وكل شويه اسمع ستات بيزغرطوا اتاري في شهيد داخل !!

كل ده ومفيش مايه و مفيش اكل الا قليل من المايه بتتوزع كل فين وفين وشويه واتلقيت امهات بتدور على عيالها وعيال مش لاقيين امهاتهم منهم اللي كنت شيلاه اتلقيت بعد فتره راجل بيدور على طفل فوريتهوله قالي اه هوه ده فأخده هوه واخوه والحمدلله 

لكن كان كل فتره تيجي ام تدور على عيالها جوه المسجد وهي عماله تبكي حاجه تقطع القلب 

مشيت شويه جوه المسجد وصوت ضرب النار وصوت الانفجارات مبتوقفش روحت وقفت جمب الشهداء وهما مترصصين جمب بعض وقفت جمبهم بالظبط وقفت مخوفتيش اصلهم مكانوش بيخوفوا خالص 

شوفت كتير منهم نايمين مبتسمين وشكلهم نظيف اوي ومنهم واحد كان جمجمته مكسوره وسُمك جلد راسه متشال كده وشوفت شهيد نايم ومحطوط فوقه نص إزازه بلاستيك مكسوره من النص ومحطوط فيها امعائه اللي خرجت منه 

وشوفت ست جايبه اطفالها الاتنين وقاعده جمب شهيد وعماله تبكي وتقولهم انا عايزاكم زي دول علشان تروحوا الجنه وستات بيبكوا ورجاله بيبكوا خلوا الرجاله تبكي ربنا ينتقم منهم ويرنا فيهم ايه 

قولت اخرج بره وادور على صحابي من الباب اللي ناحيه المستشفي الميداني جايه اخروح الاقي صوت ضرب النار قريب اوى ومن كل الاتجاهات مش عارفه احدد منين بالضبط عارفين احساس لما تكون عايز تطلع راسك بس من ورا عمود راسك بس وتحس انك هتاخد رصاصه بمجرد ما انت هتبص نص بصه كده 

رجعت وقولت اقرأ قراّن ومن رحمه ربنا مكنش معايا غير المصحف والموبايل قرأت قراّن وفضلت استغفر وشويه وبعض اصحابي اتلقيتهم جاينلي بيطمّنوا عليا عملت ايه !!

وبعدين سابوني وراحوا عند المنصه طلعنا من الباب التاني للمسجد اقسم بالله ما عارفه الضرب بيجي منين علشان حتى نتحاشاه مشوا هما وراحوا للمنصه وانا فضلت في حيره مش عارفه اعمل ايه !!

دخلت المسجد تاني والناس في حيره من امرها نعمل ايه !!

ستات كتير كانوا ماشين منغير الحذاء بتاعهم وكتير بيدوروا على باقي هدومهم مش لاقينها واللي عرفوا ان حاجتهم كلها اتحرقت في الخيم خلاص واللي بتحكيلي انها دخلت الخيمه علشان تجيب الدوا بتاع عين اختها اتلقيت الخيمه بتتحرق طلعت تجري منها واللي بتقولى ان الخيمه بتاعتهم كان فيها مصحف كبير في كيسه بلاستيك راحت الخيمه وقتها وقت ما الخيم كانت بتتحرق اتلقيت المصحف بالكيسه ساحوا ونزلوا سائل على الارض 

وكل اما افتكر خيمه بورسعيد واعرف انها اتحرقت زي باقي الخيم ازعل اوي اصل كان فيها كميه مصاحف كبيره 

اكيد المصاحف كلها اتحرقت اللي في خيمه بورسعيد واللي في باقي الخيم 

وقفت في الساحه اللي عملينها بره المسجد كمصلى للسيدات تاني اللي راح اكيد عارفها 

وريحه الغاز جامده في المكان ده لانه مش متقفل اوي مفتوح من الجنبين 

دخلت جوه المسجد نفسه وصليت وفضلت اقرأ قرأن وارد على التليفونات اللي بتجيلي ان امكن لان الشبكه كانت وحشه جدااااااا

الساعه جت 5 , 5 ونص كده واتلقينا باب المسجد المؤدي للساحه اللي بره دي بيخبط جامد الناس فضلت تصرخ افتكروا البلطجيه داخلين علينا المهم فتحوا الباب وطلعوا الناس اللي فى الساحه اللي بره بيستغيثوا اترمى عليهم نار وغاز كتير فعايزين يدخلوا يحتموا في المسجد المهم دخلوا والاعداد كترت جدا لدرجه اني حسيت اني هموت لتاني مره مخنوقه مش برصاص والشبابيك خايفين نفتحها والابواب مقفوله وفجأه 

اضرب نار علي المسجد واحنا جواه كسر إزاز الشباك اللي كان قصادي ووقتها قولت دول هيقصفوا المسجد واحنا فيه لاني علمت ان المنصه وقفت وان الميدان فضى مفيش ناس في الميدان الا اللي في المسجد اتصلت بماما وقولتها سامحيني وقفلت واتصلت بمحمود زوجي وقولتله خلاص يا محمود خلاص وانا منهاره في العيط وقفلت والموبايل فصل بعدها 

صوت الضرب بيزيد وفجاه فتحوا الباب وقالولنا اخرجوا بسرعه انا معرفش مين اللي قال ونخروج فعلا ولا دي خدعه المهم ست طيبه جدا كانت معايا في المسجد سمعتني وانا بقول لماما سامحيني فقالتلى انا مش هسيبك انا زي امك مع انها كان جايلها خبر استشهاد زوجها وكانت منهاره وكان معاها ودائع كتير لناس سابوها معاها بطايق وفلوس فضلت ماسكه ايدي وطلعنا 

المشهد ده مش قادره انساه وقت طلعونا من المسجد طلعنا زي ما يكون اسرى وعلى الجانبين مسلحين مصوبين السلاح في وشنا لابسن اسود وجسمهم ملفوف عليه السلاح اللي بيقولوا عليهم الفرق الخاصه وطلعنا وسطهم وعلمنا ان ده (( خروج امن )) ازاى ووقت ما كنا خارجين كان ضرب النار شغال نحيتنا والشهدا ناس شايلاهم وهما ماشيين

حتى رجل شهيد خبطت في راسي وهو محمول على اكتاف الرجاله وشوفت ناس غرقانه في دمها مش عارفين يروحوا فين لو راحوا المستشفى هيعتقلوهم ويخلصوا عليهم 

وفضلنا ماشين زي ما الرجاله اللي معانا يقولولنا وكان لسه في ناس مخرجوش من المسجد كانت اسراء صاحبتي واحده منهم وانا معرفش انها في المسجد برضو وحكتلي انهم رموا عليهم جوه المسجد نار وهما لسه جوه وكانت عماله تجري هيه والناس اللي لسه في المسجد لبره علشان المسجد بيولع ربنا ينتقم منهم بيولعوا المسجد والأحياء فيه والاموات فيه طبعاا الشهدا اللي قعدت انا وسطهم فتره دول اكيد اتحرقوا ربنا ينتقم منك يا سيسي ومن اللي بيأيدك 

فضلت اسراء تجري والنار بتاكل المسجد وهي خارجه ست جمبها خارجه برضو اخدت رصاصه في راسها توفت في الحال ومحدش شالها سابوها لان هيودوها فين اللي بينجد حد بيضربوا عليه علشان يموت هوه كمان وخرجت هي من عند النصب التذكاري وبتحكيلي ان الطريق كان مليان جثث بيعدوا من فوقهم والجيش بتاعنا العظيم والداخليه الشرفاء كانوا عمالين يشوروا عليهم هي واللي خارجين معاها ويضحكوا ووقفين فوق المدرعات يطلعولهم لسانهم !!

اما الطريق اللي انا مشيت منه كان فيه الفرق المسلحين دول واحنا ماشيين وسطهم ومشينا شوارع كتير لغايه لما ركبت مع الست اللي كنت معاها ووقتها خالى عرف يوصلي وروحت عنده 

دي الحكايه زائد شويه حجات مش مهمه اوي ومش بارزه اوي زي اللي حكيته ...

أما بالنسبه للسذّج اللي بيقولوا اننا مسلحين بتهيألى مفيش مسلحين وإرهابين بيحصل معاهم كل ده منغير ما يردو

واللي بيقولوا ان قادتنا ارهابيين كانوا دافعوا عن عيالهم اللي استشهدوا اولى زي الشهيد ابن الدكتور محمد بديع ولا الشهيده بنت الدكتور البلتاجي ولا غيرهم 

واللي بيقولوا اننا اللي حرقنا المسجد علشان احنا ارهابين والهكس ده بتهيألى مش هتحرق المسجد وبقيتنا لسه فيه وجثث الناس اللي معانا فيه لسه 

واللي بيقولوا وبيقولوا واللي لسه مصدقين خبيتهم وغبائهم 

احب اقولكم انكم لن تسلموا من دعاء الاطفال ولا السكالي ولا الشيوخ ولا المصابين والجرحي ولا اهالى الشهداء عليكم وعلى تأيدكم لقتلنا حتما سينالكم دعائنا يوماً ما في محياكم او في مماتكم 

وموكد يوماً ما ستأتي نهايه الظالمين السيسي ووزير داخليه ومن يعاونهم ولكن صبـــــــــــــــــــــــــرا الجنه تعد للصالحين الذين ينصرون الحق والنــــــــــــــــــــــــار أيضاُ تعد للظالمين وتقول هل من مزيد ..